PEUREUNO MAKNA MOLÔD KEU ANEUK ATJÈH DI SWEDEN


author photo

21 Nov 2018 - 16.36 WIB


RadarAceh. Com, Sweden *SEUBAGOË* saboh bansa di ateuëh rhuëng dônja, Atjèh saban lagèë bansa laén teutap na basa, adat, reusam njang meudjampu deungon Islam. Salah sabohdjih njan na keuh peu-ingat molôd. Bah that pih hana lé dalam buleuën Rabi'ul Awwal, mungkén golom na bansa laén lam dônja njoë njang peu-ingat molôd sampoë lubèh 3 buleuën seulaén bansa Atjèh. Tutoe Asnawi Ali pada RadarAceh.

Ulèh sabab njan, komunitaih bansa Atjèh njang na di udjông dônja lagèë di Sweden njoë teutap hana teuwo geuh bak geupeu-ingat molôd. Dalam musém lupië njang teungoh meubalôt deungon saldju, nibak tanggai 20 Februari leupah di kuta Örebro, seukita 80 droë agam inong tuha muda, aneuk miët tjut-tjut njang lahé dan rajek di Sweden, geupeugôt chanduri molôd deungon batja seulaweut, tja-é Islami, thausijah agama dan silaturrahim.

Bansa Atjèh njang teuka dari padum boh kuta di Sweden karap bandum geuba aneuk miët geuh. Tudjuan meunan supaja geupeureuno dan prakték langsông pakiban seulaweut sampo geupeutrang peuë makna molôd njan. Njoë keubiët that peunténg meusabab aneuk muda njang lahé dan rajek di Sweden hantom djikalon keudroë pakiban molôd lagèë sidéh di nanggroë Atjèh.

Meunjoë biasadjih ureuëng geutanjoë sabé meutulak tren peugah haba dikeu podium, djino di Sweden hana lé budaja meunan. Geutanjoë meusti beuhe peugah haba dikeu ureuëng ramé! Asoë tjeuramah peukara molôd antara laén geupeusampo lé Tgk Hasanuddin, Tgk Syahbuddin Abdurrauf dan Tgk Fadhil Amin.

Dalam tjeuramah njang seugolomdjih geupeuphôn batja ajat sutji Al-Qur'an ulèh Tgk Ramli Abubakar, lubèh fokus peusan tjeuramah njan keu aneuk muda njang lahé dan rajek di Èropa njoë. Disampéng nibak njan, tjalitra singkat peurdjuangan sampo kisah akhlaq nabi. "Njang lubèh peunténg na keuh molôd njan bék hanja buët pudjo-pudjo mantong teutapi peuë njang geuju lé Nabi beuna tapeugot".

Hana teuwo tjit bak akhé atjara, ureuëng inong ka geumagun peunadjôh seubagoë seudeukah njang geuba dari rumôh maséng-maséng. Bungkôh makanan njan geuchanduri meuramiën sira duëk peugah haba silaturahim deungon rakan-rakan.

Hudép di lua nanggroë njang meubida budaja kon alasan untok tapeugadöh budaja droë teuh. Seubalékdjih, bah that pih djeuôh dari nanggroë, budaja Islami lagèë molôd teutap ta djaga. Dan njan akan meusambông ta peutrôh keu aneuk-tjutjo teuh. Tutoe Asnawi Ali. (MK)
Bagikan:
KOMENTAR